話說小弟剛剛開始要到外科部門上堂。
同大家一樣，最期待嘅都係血淋淋嘅畫面，外科醫生拎住手術刀狂劈，出返黎成身血嘅樣。
少年，你太年輕了。
科技日新月異，而家好多手術都唔會開咁大嘅傷口，轉做微創手術。微創手術對病人黎講係一大喜訊，但係呢件事對醫學生黎講，係一大惡夢。
做醫學生嘅都只會有機會旁觀手術，企到遠一遠咁望住醫生嘅英姿；可惜而家轉做微創，我地睇嘅就係佢打機嘅樣貌，同埋螢幕上嘅影像，基本上係同大家上YouTube睇係無分別。最大唔同係你係屋企可以訓住睇、坐住睇、倒立睇、跳住睇、兩倍速睇、同埋唔睇，醫學生係只可以企足咁多個鐘，睇人打機......
除左腳痛之外，呢樣甚至係會令我地肥佬嘅原因。事關我地考試嘅其中一部份，就係幫病人做身體檢查，「攞足料」去匯報同埋診症。問題係，而家大家都轉做微創，醫生手勢亦越黎越好，傷口位置越黎越隱蔽、亦都越黎越細，有時指住都未必見到，何況考試心跳加速手心冒汗之時？攞唔足料，就斷錯症，斷錯症就好易肥佬......
我都好高興有新技術幫到病人，但係......
Search